الخميس، 27 نوفمبر 2008

استدعاء



بملامح غاضبة اجتاز الطبيب الكبير دكتور "ابراهيم الشيخ" أبواب مستشفاه الاستثماري الفخم... كان غضبه واضح و كان أمر مفهوم للجميع... هو لا يرحب أبدا بالاستدعاءات الليلية... و يرى أنه على أي طبيب يوجد في مشفاه أن يبذل قصارى جهده لإنقاذ أي حالة مهما كانت خطورتها دون العودة إليه... و كان دائما ما يختم محاضرته لهم بقوله :-" أمال بدفعلكم فلوس على إيه...عشان تصحوني كل يوم بالليل و اجي اعالج لكم الحالات!!".... دائما ما كان يذكر انه لم يصل لتلك المكانة من فراغ... لم يحقق الثراء من العدم...لقد تعب و اجتهد و تذلل و كافح و و و و ....حتى يصل إلى لقب الطبيب الكبير... لذا كان غضبه واضحا للجميع.... توعد الفريق النوبتجي من الأطباء بجزاء ضخم لو لم تكن الحالة- التي استدعوه بسببها في الرابعة فجرا – تستحق... قابله أحد الأطباء الشبان بوجه ممتقع و قال له:-"سيدي..حمدا لله أنك استجبت... أن الحالة خطيرة بالفعل و.."....قاطعه د/إبراهيم في صرامة:-" أرجو أن تكون حالة تستحق"...لم يرد الطبيب الشاب بل خفض وجهه و لم يجد ما يرد به....بادره د/إبراهيم قائلا في حزم :-" ما الحالة؟!"...تردد الطبيب الشاب قبل أن يجيب:-" إنه...إنه مصاب في حادث سيارة"...ثم أردف في سرعة:-"لكنه مصاب بشدة يا سيدي....أخشى أنه فات أوان الإنقاذ"....لاحظ د/إبراهيم الوجوه الممتقعة من أطباء و ممرضات و عاملي المستشفي تنظر إليه في رعب.... ابتسم في سره...لكم هو مهيب!!..لكم هو جبار!!.... حينما وصل الاثنان إلى غرفة الطوارئ حيث لا يزال المصاب مستقرا فتح الطبيب الشاب الباب....نظرة واحدة كانت كفيلة بأن يتغير كل شئ....بالنسبة للعاملين في المستشفى لم يكن ذلك المصاب سوى المصاب في حادث....لكن بالنسبة له لم يكن هذا المصاب سوى ابنه.....هنا فقط علم د/ ابراهيم أن الحالة تستحق...

************

تنويه:- معلش يا جماعه القصه المرده دي قصيره اوي....للأسف انا مكنتش عايز كده....انا عامل مجموعة قصص قصيره اوي من نفس القطعيه بس كنت ناوي انزل اربعه او خمسه في البوست الواحد مع بعض...لكن نظرا للظروف المرضيه الشديده و اللي معاها مش عارف اطلع صوتي حتى... ويتزامن مع ذلك ارهاق شديد عشان انا ملتزم اوي –بحيلتها- و اروح مستشفى الاطفال في صيدناوي كل يوم و كمان اروح عملي الباطنه و انا تعبان كده....فالحمد لله انه اداني القدره اني اكتب الحدوته دي كمبيوتر و قلت انزلها عشان انتو وحشتوني و بقالي كتير منزلتش...بس قريب ان شاء الله لما اخف هنفذ الفكره اللي قلت عليها دي....حتى كنت هسميها قصاصات او مثلا استدعاء و قصص اخرى...على هذا النسق يعني...لكن هي فعلا للأسف قصيره جدا ..قصاصة يعني... وانا ممكن ان شاء الله اضمها للمجموعه لما اكتبهم كلهم وورد و انزلهم مره واحده ان شاء الله...

شكرا لكم و دمتم بكل خير........

هناك 28 تعليقًا:

Dr. Ibrahim يقول...

يا عم رامى ربنا معاك

وعلى فكرة القصص القصيرة كده احسن

كل واحد فى بوست لوحده عشان نركز ونستمتع اكثر

وفعلا القصة بتاعتك مؤثرة جدا

سبحان الله

مكانش راضى يدخل وكان يتوعدهم لو كانت الحالة متستحقش

والآخر يطلع ابنه سبحان الله

تحياتى

د إبراهيم

نـــــور يقول...

سلامتك يارامى الف سلامه
يبدو ان المرض واخدنا احنا الكل
ربنا يقومك سالم يارب
بخصوص القصه ماهو لو كل طبيب عرف ان كل مصاب هو ابنه او اخوه او امه او ابوه
اكيد هيتعامل معاها بنفس الاهتمام
لكن ماتزعلش منى يارامى
اوقات بحس انكوا من كتر اللى بتشوفوه قلوبكوا بتبقى قاسيه اوى

انا خالو بيتعامل مع ولاده وهما عيانين بمنتهى البرود رغم انه من اكتر الشخصيات الحنونه اللى عرفتها
ربنا يقومك بالسلامه يارب
وادعيلى لانى كمان فى نفس ظروف تعبك ومشغولياتك :((

مفكر يقول...

السلام عليكم::

شفاك الله وعفاك،،

القصة بالعكس جميلة وسهلة الهضم ولذيذة،،

ممكن تعلمك مدونة للقصص الطويلة والأخرى للقصيرة،،

علشان لما أكون فاضي أدخل على الطويل،،

دمت في حفظ الله ورعايته

نيرة و منةالله يقول...

معلش ايه؟
دى تحفة اوى
بجد
وكمان مؤثرة جدا
انا متخيلة الباقى على فكرة
انا بحب القصص الى تخلى الواحد يتخيل هو الباقى
جامدة
سلامات

mahasen saber يقول...

برغم صغر الاحداث الا انها قصه قصيره من اروع ما يمون
الحدث الاخير مديها عمق وصدمه
ومدينا احساس بانتهاء القراءه كأننا انتهينا من قراء قصه طويله

يا ريت تنزل قصص من دى كتير
لانها لا تقل روعه عن القصص الطويله

mahasen saber يقول...

وعلى فكره يا رامى انا جايه
اعتذرلك عن غيابى عنك
انا اسفه جدا
انتا ومدونتك تستحقوا منى الكثير
من الخير طبعا

بس سؤاء زرتك او اتاخرت فى زيارتك اشهد الله انى احبك فيه
وانى اعزك معزة وغلاوة اخويا
وبشوف فى جزء كبير منك صوره حلوه بتمناها لابنى لما يكبر
..فمتزعلش من تقصيرى معاك..

سارة نجاتى يقول...

ألف سلامة عليك يا برنس , خلى بالك من الأدوار الماشية اليومين دول

و بعدين , هى القصة بتتقاس بالشبر؟؟ , أنت مش شفت قصص قصيرة مكونة من سطرين , متسمعش كلام اللى يقولك المقاس و الحجم و الكلام ده , أنت قلت فى الحبه دول فعلا زى ما محاسن قالت كأنك كنت عامل تسلسل فى النص
و بعدين أنت وصلت الاحساس و ده المهم

و على فكرة كويس أنك نوهت انها جزء من مجموعة قصصية لها نفس الطبيعة لأنها خلتينى أستوعب الصورة أحسن , و ممكن تنزلهم اتنين فى اتنين مثلا.

امض قدما يا باشا

سلام

prince4ever يقول...

إلى د/ابراهيم سماحه
ازيك يا دكتور... منورني و منور الدنيا كلها بتشريفك و برأيك الجميل ده... مادام انت شايف ان كده احسن خلاص هنزل كل قصه في بوست لوحده صغيره صغيره بقى مش مهم
بس انا مقصر اوي معاك و والله مدايق من نفسي بس ان شاء الله قريب اوي هكون عندك ..دي خساره ليا مش ليك يا دكتور
سلامي لمرحومك اللي اتجمد في التلاجه ده
تحياتي

prince4ever يقول...

إلى حبيبه
ازيك يا حبيبه... الله يسلمك يا رب
يا رب تكون الحدوته عجبتك
لأ طبعا مقدرش ازعل منك و متفق معاكي بشده...بس هي قلوبهم مش بتقسى أد ما الموضوع بيبقى تعود... يعني شفت الكلام ده كتير لما بقى ممل... يعني انا مثلأ...اول ما رحت مستشفى الاطفال ده و شفت عيال عندهم فشل كلوي كنت بقول يا ضنايا و اسمك ايه يا حبيبي و الدمعه هتفر من عيني...بعد كام مره و شفنا عيال كتير اتقلب الوضع وبقيت اقول اسمك ايه ياله..حاسس بايه يا ... كده يعني... التكرار بيموت حاجات كتير جوانا
و اهلي بيتعاملوا مع مرضي بمنتهى البرود وهما اساسا مش دكاتره..هههههههه..عادي اوي
بس بجد منوراني يا حبيبه و سلامي لخالك الدكتور
سلام

prince4ever يقول...

إلى مفكر
عليكم السلام يا برنس و الله يسلمك
متشكرين يا معلم على رايك الجميل ده في القصه و متشكر اكتر على متابعتك ليا
ربنا يخليك لينا يا باشا
لأ يا عم مقدرش اعمل مدونات تانيه..كده عنب اوي
سلام يا برنس

prince4ever يقول...

إلى نيرة و منة الله
اولا ازيكما او ازيك واحده بس باعتبار ان المتكلم بيتكلم بضمير انا مش احنا
ثانيا مشرفاني او مشرفيني بأول زياره و هي زياره جميله بجد
متشكر جدا على رايك الجميل ده.. بجد انا سعيد به جدا و مبسوط كمان على حكاية انا متخيله الباقي دي...
ان شاء الله هكون عندكم قريب..انا والله عديت بس احترت اعلق في انهي مدونه..مالاتنين ذوات الرداء الاحمر..طب خلو واحده احمر وواحده لون تاني يعني...الدنيا مداقتش
مبسوط جدا بالزياره دي واتمنى تكرر
سلامات

prince4ever يقول...

إلى استاذتي واختي الكبيره محاسن صابر
متقوليش كده يا استاذه...أنتي على راسي من فوق و تيجي في اي وقت براحتك ميهمكيش..كفايه بس اننا نطمن عليكي... انا اولا متشكر على رايك في الحدوته... بجد اداني ثقه كبيره في نفسي وفي اللي بكتبه بعد ما كنت فقدتها نسبيها لأسباب كده.. وكمان شجعتيني اني انزل قصص من النوع ده تاني..وهما موجودين بس كنت متخوف من النقطه دي
ثانيا انا متشكر اوي على الكلام الجميل ده كله... والله يشهد اني ابادلك الحب في الله و انا مليش غير اخ وحيد و ماليش اخوات بنات بس و الله معزتك عندي زي ما تكوني اختي الكبيره بالظبط يا استاذتي..
متقوليش عاوزه عبده يبقى زيي... ان شاء الله يبقى احسن مليون مره.. هو احنا نطول نبقى ربع عبده
و براحتك يا استاذتي تشرفي في اي وقت والله ربنا يعينك على الحاجات الكتير اللي وراكي دي و يريح بالك يا رب
نورتيني يا استاذتي
تحياتي

prince4ever يقول...

إلى ساره نجاتي
ازيك يا ساره
اخبار الفيلسوفه العبقريه بتاعتنا ايه...
معاكي ان القصه مش بحجمها ولا بطولها..ده اكيد..ده احسن كمان ان القصه تبقى قصيره و تقدر توصل الفكره..ده احسن للقارئ وتصب في مصلحة الكاتب... بس انا كنت اقصد بس اني كنت بكتب قصص اطول من كده بكتير فقلت انوه عشان محدش يستغرب..زي مانتي قلتي بالظبط
ان شاء الله ممكن انزل اتنين اتنين او واحده واحده عشان تاخد حظها من القرايه برده..على حسب يعني
متشكرين ليكي يا ساره و الله يسلمك
ان شاء الله همضي قدما..
سلام

kochia يقول...

الف سلامة عليك
وان شاء الله تبقي بكل خير
وحلو موضوع القصة رغم انها صغيرة اوي بس المهم الفكرة اللي بتقدمها
وانا رايي قصة في البوست احسن من عدة قصص وممكن تنزلهم علي فترات صغيرة بس واحدة احسن من حيث التركيز والتعليق

اما القصة دي
الانسان ده صورة لناس كتير في المجتمع في شتي المجالات .. بس الامر بيظهر فعلا في مهنة الطب اللي فعلا قد كدة بتكون حساسة
المفروض كل واحد يقوم بواجبه علي اكمل وجه في كل الاوقات

تحياتي
وتمنياتي بالشفاء

Unknown يقول...

ايه ...يا دين النبي ايه الحلاوة دي ....هيههه....عظمه علي عظمه يا ست....

Kiara يقول...

الف الف الف مليون سلامه ومش تعتذر ربنا معاك ويشفيك

وبجد المغزي من القصه رائع

نـــــور يقول...

ازيك يارامى
انا جيت اسأل عليك واطمن عل صحتك
اشوفك لسه متدهور زى حالاتى ولا خفيت
هو انت مش دكتور ف البلد ؟
ازاى تسيبنى مدمره كده امممممممم؟
مع انى اصلا مش بحب الدكاتره واقصد الكشف عندهم يعنى احم احم :)
بس برضه بما انك غالى عليا برضه مكنتش هاجى انفعك بالفيزيتا p:

طمنى عليك

الازهرى يقول...

عزيزى الامير

الف حمد لله على السلامة

القصة ليست بطولها ولكن بما تعطى من معنى
والكلمات القلية افيد من الكثير الذى ينسى بعضه بعضا

تحياتى
وكل سنة وانت طيب

"عبير النجار "نيجار يقول...

أولا الف سلامه عليك يا رامي
وان شاء الله تخف بسرعه وترجع
وبجد القصه جميله وما دام وصلنا الهدف منها يبقى مالهاش لازمه الاطاله على الفاضي إسلوبك مميز جدا،
وكل سنه وانت بالف صحه وسلام
تحياتي ليك

mahasen saber يقول...

رامى الرائع الجميل كل عيد وانتا بالف خير وسلام
واسرتك و ومامتك واخوك
وكل من تحب
بكل صحه وستر

ربنا يصلح حالك ويباركلك ويوفقك فى كل خطوات حياتك
انتا اليى اخ عزيز فعلا
ربنا يرضيك ويكرمك يا رامى يا رب

نـــــور يقول...

كل سنه وانت طيب
كل عيد وانت سعيد
ربنا يسلمك كلك زوق يارامى
ربنا يكرمك يارب ويجعل ايامك كلها اعياد

FreeKiller يقول...

كل سنة و انت طيب يا رامي
معلش متأخرة بقى
بس اول يوم العيد صعب الواحد يقعد عالنت
يا رب السنة الجاية تكون بتحج هناك ف مكة

عيد سعيد

kimo يقول...

القصة حلوة أوى يا رامى وياريت تكتب اجمل من كده كمان

kimo يقول...
أزال المؤلف هذا التعليق.
اقصوصه يقول...

قصه جميله

وكل عام وانتم بخير :)

نـــــور يقول...

نو كومنت على كومنتك :)
بس نفسى ابطل يارامى اوى اوى
ادعيلى
ازيك انت ولف فى بلوجى براحتك
تحب اعملك كارنيه عضويه.؟ :)

طوبه فضه وطوبه دهب يقول...

الف سلامه عليك يادكتور انا لاحظت غيابك عن اخر موضوعاتى قلت اخش اعاتب لكن واضح ان انا اللى محتاجه العتاب اسفه على التاخير وعدم السوال وربنا يشفيك ويعفو عنك وفى انتظار اخر قصصك واكيد فى اى شكل هتكون رائعه باذن الله فى انتظارك اخى العزيز

شمس النهار يقول...

القصه حلوه مالها
قصيره طويله المهم الاسلوب وطبعا ده جميل
سلامتك يادكتور الف سلامه
وهحاول اقرا كل اللي فاتني وانا في الحج